બંગાળની ખાડીની લો-પ્રેશર સિસ્ટમના કારણે ઉત્તર ગુજરાતના 47 પૈકી 35 તાલુકાઓમાં મેઘમહેર થઇ હતી. જેમાં સુઇગામમાં સૌથી વધુ 3 ઇંચ વરસાદ ખાબક્યો હતો. ત્યારબાદ વાવ અને હારિજમાં 1.50 ઇંચ તેમજ થરાદ અને ભાભરમાં 1.25 અને કડીમાં 1 ઇંચ વરસાદ નોંધાયો હતો. આ વરસાદનો રાઉન્ડ આગામી 11 સપ્ટેમ્બર સુધી રહેશે. હવામાન વિભાગે 11 મીએ બંગાળની ખાડીમાં વધુ એક લો-પ્રેશર સિસ્ટમ રચાઇ શકે તેવી શક્યતા વ્યક્ત કરી છે. જે સિસ્ટમ ઉત્તર-પશ્ચિમ દિશામાં આગળ વધશે તો ઉત્તર ગુજરાતને વધુ એક વરસાદના રાઉન્ડનો લાભ મળશે. મહેસાણા જિલ્લાના કડીમાં 26 મીમી,બહુચરાજીમાં 12 મીમી,ઊંઝામાં 11 મીમી,વિસનગર,વડનગર અને ખેરાલુમાં 5-5 મીમી,મહેસાણામાં 3 મીમી, વિજાપુરમાં 2 મીમી વરસાડ પડ્યો હતો. બીજીતરફ દાંતીવાડા પંથકના ભાકોદર ગામે જીવંત વીજવાયર તૂટી પડતાં ગામના ખોડાભાઇ મશરૂભાઇ આલનું મોત થયું હતું. જ્યારે ધાનેરામાં વાવાઝોડાથી એક મોબાઇલ ટાવર ધરાશાયી થયો હતો.
