હવામાન વિભાગની આગાહી મુજબ અમદાવાદમાં 19 જુલાઇ સુધીમાં વરસાદ પડે તેવી શક્યતા છે.ત્યારે બીજીતરફ અમદાવાદ મ્યુનિસિપલ કોર્પોરેશને પ્રિ-મોન્સુન કામગીરી શરૂ કરી છે.પરંતુ અમદાવાદમાં જ્યાં જુઓ ત્યાં ખાડા જોવા મળી રહ્યા છે.જેમાં અમદાવાદના મધ્યેથી પસાર થતા 132 ફૂટ રીંગ રોડ ઉપર મેટ્રોનું કામ અને પાઈપલાઈનનું કામ ચાલી રહ્યું છે.જેને લઇને દર 100 મીટરના અંતરે ખાડો ખોદેલો જોવા મળે છે.જેને પરિણામે ટ્રાફિક જામની સમસ્યા સર્જાય છે.ખાડામાંથી ઉલેચેલ માટીને લઈને પણ સતત ધૂળ ઊડતી હોય છે.તેવા સમયે જો વરસાદ પડે તો રોડ ચીકણો થવા ઉપરાંત ભૂવા પડવાથી પણ અકસ્માતો બનવાની સંભાવના વધે છે.ત્યારે આસપાસના નાગરિકોએ આ કામ તુરંત પૂર્ણ કરવામાં આવે તેવી લાગણી વ્યકત કરી છે.આમ ચોમાસામાં મોટાભાગનું અમદાવાદ ખાડાનગર બને છે.જ્યાં જુઓ ત્યાં પાણી ભરાયેલા જોવા મળે છે.132 ફૂટ રિંગ રોડ પર પણ પાણી ભરાવાની સમસ્યા પહેલેથી જ છે.વધારામાં આ પ્રકારની પ્રવૃત્તિઓથી નવી સમસ્યાનું સર્જન થઇ શકે છે.ત્યારે નવી ચૂંટાયેલી એએમસીની ટીમ આ પ્રશ્નનું નિરાકરણ લાવે તેવી લોકોની આશા છે.
