ભાજપે આગામી વર્ષે યોજાનારી 5 રાજ્યોની વિધાનસભા ચૂંટણી માટે તૈયારીઓ શરૂ કરી દીધી છે. જેને લઈ પાર્ટીએ પાંચેય રાજ્યો માટે પોતાના પ્રભારીઓની ઘોષણા કરી દીધી હતી. કેન્દ્રીય મંત્રી ધર્મેન્દ્ર પ્રધાનને ઉત્તરપ્રદેશ વિધાનસભા ચૂંટણી માટે પ્રભારી તરીકે નિયુક્ત કરવામાં આવ્યા છે. જ્યારે કેન્દ્રીય મંત્રી અનુરાગ ઠાકુર,અર્જુનરામ મેઘવાલ,સરોજ પાંડેય,શોભા કરંદલાજે,કેપ્ટન અભિમન્યુ,અન્નપૂર્ણા દેવી અને વિવેક ઠાકુરને ઉત્તરપ્રદેશ ચૂંટણી માટે સહપ્રભારી બનાવવામાં આવ્યા છે. આ સિવાય પાર્ટીએ ઉત્તરાખંડ માટે કેન્દ્રીયમંત્રી પ્રહ્લાદ જોશીને જવાબદારી સોંપી છે, તેમની સાથે લોકેટ ચેટર્જી અને સરદાર આર.પી સિંહને સહ પ્રભારી બનાવવામાં આવ્યા છે. પંજાબ ચૂંટણી માટે કેન્દ્રીયમંત્રી ગજેન્દ્રસિંહ શેખાવતની સાથે હરદીપપુરી,મીનાક્ષી લેખી,વિનોદ ચાવડાને પ્રભારી તરીકે નિયુક્ત કરવામાં આવ્યા છે. ગોવા ચૂંટણી માટે મહારાષ્ટ્રના પૂર્વ મુખ્યમંત્રી દેવેન્દ્ર ફડણવીસને જવાબદારી સોંપવામાં આવી છે. જ્યારે મણિપુર વિધાનસભા ચૂંટણી માટે કેન્દ્રીયમંત્રી ભૂપેન્દ્ર યાદવને પ્રભારી બનાવવામાં આવ્યા છે. આમ ઉત્તરપ્રદેશ,પંજાબ,ઉત્તરાખંડ,ગોવા,મણિપુરમાં વર્ષ 2022માં વિધાનસભા ચૂંટણી યોજાવાની છે. જે માર્ચ-એપ્રિલ માસ દરમિયાન આ રાજ્યોમાં ચૂંટણી યોજાઈ શકે છે. જેને લઈ તમામ રાજકીય દળોએ અત્યારથી કમર કસી લીધી છે. વર્તમાન સમયમા 5 પૈકીના 4 રાજ્યોમાં ભાજપની સરકાર છે જ્યારે પંજાબમાં કોંગ્રેસની સરકાર છે. આ પાંચેય રાજ્યોની વિધાનસભા ચૂંટણીને મિશન 2024 માટે સેમીફાઈનલ માનવામાં આવે છે.
