ચીનની ઉત્તર આવેલા શી આન શહેરમાં કોરોનાના સંક્રમણના કેસોમાં વધારો થતાં સરકારે 1.30 કરોડ લોકોને લોકડાઉનમાં પૂરી દીધા હતા અને તમામ પ્રકારના વેપાર-ધંધા અને કામકાજના સ્થાનો બંધ કરી દીધા હતા. આમ શહેરના તમામ નાગરિકોને ઇમરજન્સી કામ સિવાય અન્ય કોઇ કામ માટે બહાર નહી નીકળવાની તાકીદ કરી હતી અને તમામ પ્રકારના વેપાર-ધંધા અને કામકાજની ઓફિસો કચેરીઓ બંધ રાખવાનો આદેશ ફરમાવી દીધો હતો. તે ઉપરાંત એરપોર્ટથી શહેર તરફ આવતા અને શહેરથી એરપોર્ટ જતાં તમામ પરિવહનને તાત્કાલિક અસરથી બંધ કરી દેવાનો આદેશ કરવામાં આવ્યો હતો. આ તમામ આદેશનો અમલ તાત્કાલિક શરૂ કરી દેવાયો છે જ્યારે બીજી સૂચના બહાર ન પડાય ત્યાં સુધી તેનો અમલ ચાલુ રહેશે. આ સિવાય ઘરની જીવનજરૂરી ચીજવસ્તુઓની ખરીદી માટે પ્રત્યેક ઘરમાંથી એક વ્યક્તિને દર બે દિવસે એકવાર બહાર જવાની મંજૂરી આપવામાં આવશે તેમ કહેવામાં આવ્યું હતું. શિ આન શહેરમાં છેલ્લા 24 કલાકમાં કોવિડ-19ના નવા 53 કેસ નોંધાયા હતા. ચીનની સરકારે ઝીરો સંક્રમણ કાર્યક્રમ અંતર્ગત કોરોના વાઇરસના ચેપને અટકાવવા આકરા પગલાં લેવાની નીતિ અપનાવી છે. જેના પગલે દેશના જુદ જુદા શહેરોમા લોકડાઉન લાદવામાં આવે છે. સમગ્ર દેશમાં તમામ લોકોને માસ્ક પહેરવુ ફરજિયાત બનાવવામાં આવ્યું છે અને દરેક નાગરિકે ટેસ્ટ કરાવી લેવાનો સરકારી આદેશ જારી કરાયો છે.
