ઇન્ટરનેશનલ લેબર ઓર્ગેનાઇઝેશનના અંદાજ મુજબ વર્ષ 2022માં વૈશ્વિક બેરોજગારી 20.7 કરોડ પર પહોંચશે. આ આંકડો કોરોનાના રોગચાળા પહેલાના વર્ષ 2019ના આંકડા કરતાં 2.1 કરોડ વધુ છે.વર્લ્ડ એમ્પ્લોયમેન્ટ એન્ડ સોશિયલ આઉટલૂકે જારી કરેલા અહેવાલ મુજબ જુન 2021માં અંદાજ મૂકવામાં આવ્યો ત્યારે કામકાજના સમયગાળાની ઘટ એક ટકા રહેવાનો અંદાજ હતો પણ રોગચાળો ફાટી નીકળવાના લીધે જીવન અસ્તવ્યસ્ત થવા માંડયુ છે. જેના લીધે કેટલાય પ્રાંતો,વિસ્તારો અને દેશોમાં શરૂ થયેલી રિકવરી પાછી ધકેલાઈ શકે છે.આઇએલઓ મુજબ સમૃદ્ધ અર્થતંત્રોની તુલનાએ નીચી અને મધ્યમ આવકવાળા દેશોમાં રિકવરી અને રોજગાર વૃદ્ધિનો ટ્રેન્ડ નીચો છે. જેનું કારણ મહદઅંશે રસીકરણનો નીચો દર અને ચુસ્ત રાજકોષીય નિયંત્રણો છે.આઇએલઓના જણાવ્યા મુજબ વિકાસશીલ દેશો પર આ પરિસ્થિતિની વ્યાપક અસર પડશે. જેના લીધે આર્થિક અસમાનતા વધશે. કામકાજના સ્થળે સ્થિતિ વધુ બગડશે અને રોગચાળા પૂર્વેની નબળી સામાજિક સંરક્ષણ વ્યવસ્થા વધુ નબળી પડશે.
