પાટણ સહિત સમગ્ર ઉત્તર ગુજરાતમાં છેલ્લા પાંચેક દિવસથી મેઘરાજાએ બીજા રાઉન્ડની શરૂઆત કરી છે. ત્યારે વહેલી સવારથી પાટણ શહેર સહિત સમગ્ર પંથકમાં મેઘરાજા ધોધમાર વરસી રહ્યાં છે. ત્યારે ભારે વરસાદના પગલે પાટણ શહેરના બંને ગરનાળામાં પાણી ભરાઈ જતા રસ્તા બંધ થઇ ગયા હતા. જેના કારણે યુનિવર્સિટી રોડથી પાલિકા બજાર રોડ પર ટ્રાફિક જામ થતા વાહનોની લાઈનો લાગી હતી. જ્યારે ઉત્તર ગુજરાતમાં ભારે વરસાદની આગાહીને પગલે વહીવટીતંત્ર એલર્ટ થયું છે. ત્યારે પાલનપુર કલેક્ટરે જિલ્લાના તમામ અધિકારીઓને ચાર દિવસ દરમિયાન હેડક્વાર્ટર ન છોડવા માટેની સૂચના આપી છે. આમ વરસાદના પગલે શહેરના નિચાણવાળા વિસ્તારોમાં ઠેરઠેર જળબંબાકારની સ્થિતિ સર્જાતા શહેરીજનોને અનેક યાતનાઓ ભોગવવી પડી હતી. તો પાલિકાનાં પ્રિ-મોન્સુન કામગીરીની પોલ ઉઘડી ગઈ હતી. પાટણમા 15 એમએમ, સરસ્વતીમાં 37 એમ.એમ,સિદ્ધપુરમાં 48 એમએમ,હારીજમા 6 એમ.એમ,સમીમા 19 એમ.એમ,શંખેશ્ર્વરમાં 5 એમ.એમ જ્યારે સાંતલપુર,રાધનપુર અને ચાણસ્મામાં નહિવત વરસાદ નોંધાયો છે. આમ પાટણ ઉપરાંત બનાસકાંઠામાં લાંબા વિરામ બાદ ફરી એકવાર વરસાદી માહોલ જામ્યો છે. જ્યારે જિલ્લામાં ભારે વરસાદની આગાહીને પગલે વહીવટી તંત્ર એલર્ટ બન્યું છે. જિલ્લા અધિક નિવાસી કલેક્ટરે જિલ્લાના તમામ અધિકારીઓને ચાર દિવસ દરમિયાન હેડક્વાર્ટર ન છોડવા અને વરસાદને લઇ એલર્ટ રહેવા માટેની સૂચનાઓ આપી છે.
