વડોદરા મ્યુનિસિપલ કોર્પોરેશન હસ્તકના સ્ટ્રીટલાઇટનાં પોલ પર ગેરકાયદે રીતે ઇન્ટરનેટ તેમજ ટીવી કેબલ નેટવર્કના લગાવેલા કેબલો આગામી 7 દિવસમાં દૂર કરવામાં નહીં આવે તો શિક્ષાત્મક પગલાં ભરી દંડની વસુલાત કરવામાં આવશે તે અંગે કોર્પોરેશન દ્વારા જાહેર નોટિસ જારી કરવામાં આવી છે.જેમાં કોર્પોરેશનના સ્ટ્રીટ લાઈટ વિભાગ દ્વારા મુખ્ય રસ્તા ઉપર આશરે 8000 થાંભલા ઉભા કરવામાં આવ્યા છે.ત્યારે આ ઉપરાંત આંતરિક રસ્તા ઉપર પણ આશરે 8000 થાંભલા છે,જ્યારે સ્ટ્રીટ લાઈટની આંતરિક ગલીઓમાં પણ સુવિધા પૂરી પાડવા વીજ નિગમના થાંભલાનો ઉપયોગ કરવામાં આવે છે ત્યારે આ થાંભલાઓ ઉપર કેબલ નેટવર્ક પ્રોવાઇડર, ઇન્ટરનેટ પ્રોવાઇડર તેમજ અન્ય ઇસમો દ્વારા તેઓની કામગીરી માટે ફાઇબર કેબલો,જંક્શન બોક્સ,કંટ્રોલ કેબલો તેની એસેસરીઝ વિગેરે ફિટ કરીને ગેરકાયદે દબાણ કરે છે જેનાં કારણે સ્ટ્રીટલાઇટની નિભાવણીમાં અડચણ ઉભી થાય છે.આ સિવાય કેબલો ખેંચવાના કારણે સ્ટ્રીટલાઇટનું બ્રેકેટ ફરી જાય છે જેથી પ્રકાશ રોડ પર પડવાના બદલે ડીવાઇડરને સમાંતર પડે છે બ્રેકેટની દિશા બદલાઇ જવાથી ડિઝાઇન આધારિત સ્ટ્રીટલાઇટનો જે પ્રકાશ જોઈએ તે મળતો નથી,મેન્ટેનન્સ કરતી વખતે તકલીફ પડી રહી છે.કેબલનું ઇન્સ્યુલેશન નીકળી જવાથી શોર્ટ સર્કિટનો પણ ભય રહે છે.આમ આ પ્રકારનાં દબાણો દૂર કરવાં મ્યુનિસિપલ કમિશનર દ્વારા જાહેર નોટીસ આપીને જણાવાયુ છે.
